Ирон фандыры аив залты уацары
Рагзамантæй фæстæмæ, стыр ахадындзинад уыдис ирон фæндырæн нæ адæмы ‘хсæн. Йæ равзæрд ирдæй бæрæг дары Нарты кадджыты. Сырдон йæ сæфт сывæллæтты тынтæй сарæзта фæндыр æмæ йæ балæвар кодта Нартæн. Уæд Нарт загътой: «Нæ мæлæт куы ’рцæуа, уæддæр цæрæнбонтæм баззайдзæн ацы фæндыр. Чи йыл æрцæгъда, уый дзурдзæн мах тыххæй, æмæ нæ ном сæфт никуы уыдзæн...»
Уыцы ныхæсты рæстдзинад абон дæр ирдæй зыны нæ царды. Æвдисæнæн æрхæсдзыстæм, æрвылаз районы Сывæллæты сфæлдыстадон хæдзары ахуыргæнæг Кокайты Заремæ районы скъолаты ахуырдзаутæн «Фæндыры зæлтæ», зæгъгæ, цы æркаст саразы, уый. Ацы аз ацы мадзал ацыд æстæм скъолайы.
Æркаст байгом кæныны бар æрхауд нæ районы фæндырдзæгъдджыты конкурсы лауреат, республикон æркасты дипломант ансамбль «Горянкæ», кæцы йæ диссаджы рæсугъд цагъдæй барæвдыдта залы бадджыты. Дарддæр мадзалы архайджытæ срæсугъд кодтой изæр.
Стырæй-чысылæй скъоладзаутæ ирдæй сæ курдиæттæ бавдыстой. Мæнгæй нæ фæзæгъынц, Хуыцауæй æрдзон лæвæрд курдиат, дам, цыфæнды æвадат рæстæг æмæ цæлхдуртæ ницæмæ æрдаргæйæ, йæхицæн фидæнмæ скæны фæндаг. Зæрдæйæ цы цæуы, зæрдæмæ дæр уый хъары. Иуæй иннæ рæсугъддæр мелодитæ рæвдыдтой æркастмæ æрбацæуджыты, æмбæлдысты сæ удыл уалдзыгон рог дымгæйау, æвзæрын сæм кодтой уæлмонц хъуыдытæ.
Ирон фæндыры аив зæлтæй байдзаг зал, тыхджын æмдзæгъд кодтой алы фæндырдзæгъдæгæн дæр æркастмæ хуынд адæм, ирон аивад уарзджытæ.
Дызæрдыггаг нæу, Кокайты Заремæ æмæ йе ’мцæдисонты фæрцы ма бирæ азты «Фæндыры зæлты» кæй азæлдзысты Беслæныхъæуы, цæрдзæн традици!
Жюрийы сæрдар уыд Культурæйы галуаны сæргълæууæг Туаты Риммæ, æххуыс ын кодтой Сывæллæтты сфæлдыстадон хæдзары ансамбль «Саби»-йы хореограф Хъаныхъуаты Тамерлан æмæ аккомпаниатор Саламаты Ликæ, кæцытæ æппæт архайджыты курдиатæн дæр стыр аргъ скодтой, фæлæ хуыздæртæй хуыздæрты та сбæлвырд кодтой. Солистты 'хсæн уыдон уыдысты Кокайты Заремæйы хъомылгæнинæгтæ Мелыкаты Светæ (6 скъолайы ахуырдзау), Гариты Иринæ (7 скъолайы ахуырдзау), уæлдай арæхстдзинады тыххæй æппæты чысыл архайæг æхсæзаздзыд Гуыдиаты Миланæйæн (1 скъолайы ахуырдзау) æмæ Икъаты Давидæн (8 скъолайы ахуырдзау) жюрийы уæнгтæ саккаг кодтой дипломтæ.
Къордты 'хсæн фыццаг бынат бацахстой Олгинскæйы адæмон инструментты ансамбль (разамонæг Калуты Людæ), дыккаг бынат райстой Хуымæллæджы скъоладзаутæ (разамонæг Зæйналты Заремæ).
Разамонджытæ дæр рохуаты нæ баззадысты – се 'ппæтæн дæр лæвæрд æрцыд дипломтæ.
ГÆЗЗАТЫ Дианæ.
.png)
