Дыккаг хорæфснайæнтæ райдыдтой

Нæ районы зæхкусджытæ ацы аз нартхор бакодтой 17 мин гектарæй уæлæмæ. Уыйбæрц фæзуат ын а-фæстаг рæстæг никуал радих кодтой. Зæгъын æмбæлы, зайгæ дæр хорз кæй æркодта, æмæ бæрзонд тыллæг кæй æрæфснайдзысты сæ къæбицты, уый дызæрдыккаг нæу.

Йæ нартхоры хуымтæ кæрдынмæ фыццагдæр бавнæлдта хъæууон-хадзарадон кооператив «Ирбис», кусы йæхи дыууæ комбайнæй. «Ирбис»-ы зæххытæ сæхи айтыгъдтой Бæтæхъойыхъæуы быдыртыл, нартхоры хуымтæ сты 830 гектары. Æрызгъæлдтой уал сæ 60 гектары, алкæцыдæр дæтты 78 центнеры нæмыгæй.

Амы фæллойгæнджытæ ма бавнæлдтой се ‘хсынæн (100 гектары) най кæнынмæ дæр. Уый дæр дæтты хорз тыллæг, фæлæ куыст æрдзы уавæртæ йæ тæмæны бацæуын нæ уадзынц.

Сæ дыккаг хорæфснайæн куыстытæм февнæлдтой Хуымæллæджы Плиты Иссæйы номыл колхозы фæллойгæнджытæ дæр.

— Ныртæккæ хъæууонхæдзарадон куыстуæттæн сæ сæйрагдæр хæс у хорæфснайæн техникæ ссарын, уымæн æмæ се ‘ппæтæн сæхимæ нæй, — загъта нын районы администрацийы хъæууон хæдзарады хайады сæргълæууæг Гæздæнты Таймураз.

Ацы бонты фæззыгон вазыгджын куыстытæм сæхи цæттæ кæнынц районы иннæ хæдзарæдтæ дæр.

ХОСОНТЫ Земфирæ.